• Today is: Saturday, February 24, 2024

အာဆီယံ ရာသီဥတုဆိုင်ရာ နှီးနှောဖလှယ်ပွဲသို့ NUG ဝန်ကြီး ဒေါက်တာတူးခေါင် တက်ရောက်မည်

Photo-Credit

ဖက်ဒရယ်ဂျာနယ် (နိုဝင်ဘာ – ၂၁ )

 

နိုဝင်ဘာ ၂၃ ရက်နေ့မှ ၂၅ ရက်နေ့အထိ ကျင်းပမည့် အာဆီယံ ရာသီဥတုဆိုင်ရာ နှီးနှောဖလှယ်ပွဲသို့ အာဆီယံဝန်ကြီးများနှင့်အတူ အမျိုးသားညီဘညွတ်ရေးအစိုးရ NUG သဘာ၀ ပတ်ဝန်းကျင် ထိန်းသိမ်းရေးဝန်ကြီး ဒေါက်တာတူးခေါင်တက်ရောက်မည်ဖြစ်ကြောင်း NUG ဝန်ကြီးက သတင်းထုတ်ပြန်ထားသည်။

 

“သဘက်ခါ နိုဝင်ဘာ ၂၃ ရက်မှ ၂၅ ရက်နေ့အထိ အာဆီယံရဲ့ ရာသီဥတု ဆိုင်ရာ နှီးနှောဖလှယ်ပွဲကို အွန်လိုင်းမှ တဆင့်ကျင်းပသွားမှာဖြစ်ပါတယ်။ ဒီပွဲမှာတော့ နိုင်ငံတကာ ခေါင်း ဆောင်များ၊ နိုင်ငံရေး သမားများ၊ တက္ကသိုလ် ဆရာများ၊ သုတေသီများ၊ အစိုးရ အရာရှိများ တက်ရောက်မဲ့ ပွဲပါ။ အဖွင့်နေ့မှာတော့ အစိုးရတရပ်ရဲ့ ပေါ်လစီ နဲ့ စီမံအုပ်ချုပ်မှုပိုင်းဆိုင်ရာ (Policy and Governance Session) များကို နှီးနှောဖလှယ်ဖို့ တခြား အာဆီယံ ဝန်ကြီးတချို့နဲ့ အတူ ကျနော့်ကို ဖိတ်ထားပါတယ်။ ကမ္ဘာကြီးရဲ့ ကျန်းမာရေးဟာ ကမ္ဘာ့နိုင်ငံတိုင်းရဲ့ စီမံအုပ် ချုပ်မှုပေါ်လစီမှာ အရမ်းကိုမူတည်နေပါတယ်။ အဲ့ဒီပေါ်လစီတွေဟာလဲ အာဏာရှင်အစိုးရတွေမှာ အကောင်အထည်ဖေါ်ဖို့ မဖြစ်နိုင်ပါဘူး” ဟု ၎င်းက လူမှုကွန်ရက်တွင် သတင်းထုတ်ပြန်သည်။

 

အာဆီယံရာသီဥတုဆိုင်ရာ နှီးနှောဖလှယ်ပွဲသို့ မလေးရှား၊ ဖိလစ်ပိုင်၊ ဗီယက်နမ်နိုင်ငံတို့မှ ဝန်ကြီး ၃ ပါးနှင့်အတူ ဒေါက်တာတူးခေါင်တက်ရောက်မည်ဖြစ် ကြောင်း သိရှိရသည်။

 

“၂၁ ရာစုတွေမှာလူပြောများလာတာက ဌာနေတိုင်းရင်းသားတွေရဲ့ အုပ်ချုပ်စီမံခွင့် မူဘောင် (Indigenous framework) သာလျှင် ပတ်ဝန်းကျင်ထိန်းသိမ်းရေး လုပ်ငန်းများကို ထိထိရောက်ရောက်အကောင် အထည်ဖေါ်နိုင်တယ် ဆိုတဲ့အချက်ဖြစ်ပါတယ်။ ကမ္ဘာအရပ်ရပ်က နမူနာပေါင်းများစွာကို ကိုးကားပြီး ကောက်ချက်ချခဲ့ကြတာပါ။ အဲ့ဒီမူဘောင် ဆိုတာ တခြားမဟုတ်ဘူး၊ ဖက်ဒရယ်စနစ်ပါပဲ။ဖေဖေါ်ဝါရီ (၁) ရက် နေ့မှစ စစ်အာ ဏာသိမ်းပြီးနောက် လုပ် ငန်းများစွာပိတ်သိမ်းပြီး သာမန်ပြည်သူ လက်လုပ် လက်စားအများပိုင်း အလုပ်လက်မဲ့ဖြစ်ကာ ရွာပြန်ကြတယ်၊ တခြားလုပ်စရာမရှိတဲ့အခါ တောထဲဝင်ပြီး သစ်တောနဲ့ သဘာဝ သယံဇာတများကို မှီခိုရင်း စားဝတ်နေရေးအတွက် ဖြေရှင်းကြရတယ်။

 

အကျိုးဆက်အနေနဲ့ မြန်မာ့သစ်တောမြေတွေ၊ သဘာဝ သယံဇာတ တွေ ဆုံးရှုံးနှစ်နာရတယ်။ အာဏာရှင်သာ ဆက်ရှိနေရင် သဘာဝ ပတ်ဝန်းကျင်ဟာ အချိန်တိုအတွင်း ပျက်စီးသွားမှာပါ။ ဒါကို ကုစားနိုင်ဖို့ ဆိုရင် နိုင်ငံရေးတည်ငြိမ်မှ ဖြစ်မယ်၊ ဒီမိုကရေစီ နိုင်ငံဖြစ်မှ အလုပ် အကိုင် အခွင့်အလှမ်းတွ ေပေါလာမှာဖြစ်တယ်။ ဒီတော့ သစ်တော နဲ့ သဘာဝ သယံဇာတအပေါ် အလွန် အကျွံ မှီခိုမှုတွေ လျှော့ကျလာမှာဖြစ်တယ်။ မြန်မာပြည်မှာ အာဆီယံဒေသတွင်း တခုထဲသော ရေခဲ တောင်ရှိတဲ့ နိုင်ငံဖြစ်တယ်။ အာဆီယံရဲ့ အမွေအနှစ် (ASEAN Heritage) လို့ပြောလဲ ရပါတယ်။

 

ဒီလိုတန်ဖိုးရှိတဲ့ဒေသကို အာဏာရှင်တသိုက်ကြောင့် အဆုံးရှုံးမခံသင့်ကြောင်း သတင်း စကားပါးဖို့ ပြင် ဆင်ထားပါ တယ်” ဟု NUG ဝန်ကြီးဒေါက်တာ တူးခေါင် က ပြောဆိုထားသည်။